تسمع نصيحة أخوك؟.
- ماتحطش طوق حوالين رقبتك.
بمعني؟.
- ماتلزمش نفسك بوعد مادام تنفيذه هيسببلك مُشكلة.
- ماتشتريش رفاهيات وتدفع فيها كل اللي معاك، وإنت مش عارف هتقدر تكمل الشهر إزاي!.
- ماتروحش تجيب حاجات قسط علي سنين، وتفضل كل شهر تعاني عشان تدفع!.
= ديمًا.. قلل الضغطوات من عليك عشان تعرف تستمتع بالنومة، والأكلة، والضحكة، والحياة نفسها.. متعة الحياة في بساطة الأمور، وإني أقدر أقلم نفسي علي قد اللي معايا، ومش عشان حد هيقول عني معايا ساعة، او سماعة، أو موبايل، أو عربية.. بالشيء الفلاني.. أروح أنا أدمر نفسي من غير ما أحس، وأفضل مقيد روحي في سلاسل أتشد منها، وطوق والتاني لحد ما أتخنق.. تلاقي الغلبان يضحك وياكل ويتبسط حتي ولو حتة جبنة قديمة، والغني مهموم وحزين برغم إنه بياكل أفخم أكل، وده لأنه رفع سقف حياته بشكل أكبر من امكانياته، وغرس في أمور كلها ضغوطات ومسؤليات!.
- واتعلم تحاوط نفسك بالشخص اللي مابيطوقكش ويرهقك.. باللي مابيكونش عبء عليك، وحمل فوق الحمول.. باللي طلباته علي قدك، واللي ديمًا شايفك قبل مايشوف نفسه، وبيراعي ظروفك قبل ما يفكر في اللي هو عاوزه.. الحياة أجمل لو بسيطة، وتتعاش باللي معاك وعلي قد لحافك مد رجليك.. لانك لو طولت رجليك عن لحافك هتسقع وتحس بالنقص!.
- علي قد حالك ومبسوط.. أحسن مليون مره من إنك تطوق نفسك وتفضل مضغوط.

#التطويقة.

#أحمد_أيمن.